Kryeministri izraelit Benjamin Netanyahu do të propozojë ripushtimin e plotë të Rripit të Gazës kur të takohet me kabinetin e tij të sigurisë, thonë mediat izraelite.
“Ideja është hedhur. Ne po shkojmë për pushtimin e plotë të Rripit të Gazës – dhe mposhtjen e Hamasit”, citohet të ketë thënë një zyrtar i lartë.
Duke iu përgjigjur raporteve se shefi i ushtrisë dhe udhëheqës të tjerë ushtarakë e kundërshtojnë planin, zyrtari i paidentifikuar tha:
“Nëse kjo nuk funksionon për shefin e shtabit, ai duhet të japë dorëheqjen”.
Familjet e pengjeve kanë frikë se plane të tilla mund të rrezikojnë të dashurit e tyre, teksa sondazhet sugjerojnë se tre në katër izraelitë në vend të kësaj favorizojnë një marrëveshje armëpushimi për t’i kthyer ata.
Shumë nga aleatët e ngushtë të Izraelit do ta dënonin gjithashtu një veprim të tillë, ndërsa ata shtyjnë për t’i dhënë fund luftës dhe për të vepruar për të lehtësuar një krizë humanitare.
Brenda Izraelit, qindra zyrtarë të pensionuar izraelitë të sigurisë, përfshirë ish-krerë të agjencive të inteligjencës, i dërguan një letër të përbashkët Presidentit të SHBA-së Donald Trump të hënën, duke i bërë thirrje atij të ushtrojë presion mbi Netanyahun për t’i dhënë fund luftës.
Një nga nënshkruesit, ish-shefi i agjencisë së inteligjencës vendase Ami Ayalon, i tha BBC-së se veprimet e mëtejshme ushtarake do të ishin të kota.
Zhvillimet e fundit vijnë pasi bisedimet indirekte me Hamasin për një armëpushim dhe një marrëveshje për pengjet u prishën dhe grupet e armatosura palestineze publikuan tre video të dy pengjeve izraelite që dukeshin të rraskapitur.
