Kryeministri Rama ka publikuar përmes një postimi në rrjetin social Facebook, pamjet nga rruga e re Bulqizë–Librazhd, aksi Ura e Çerenecit–Zgosht, që lidh Dibrën me Elbasanin.
Sipas Ramës, rruga e re krijon një korridor të ri lindor, duke sjellë më afër bukuritë natyrore dhe pasuritë e turizmit malor.
Gjithashtu, sipas kreut që qeverisë ky aks rrugor nxit ekonominë rurale dhe i jep jetë sipërmarrjeve të reja bujqësore e turistike.
“MIRËMËNGJES dhe me rrugën e re Bulqizë–Librazhd, aksi Ura e Çerenecit–Zgosht, që jo vetëm lidh Dibrën me Elbasanin, por krijon një korridor të ri lindor duke sjellë më afër bukuritë natyrore dhe pasuritë e turizmit malor, nxit ekonominë rurale dhe i jep jetë sipërmarrjeve të reja bujqësore e turistike, ju uroj një ditë të mbarë”, shkruan Rama.
Segmenti ka një gjatësi prej 45 kilometrash dhe mundëson që distanca deri në Librazhd të përshkohet për vetëm 40 minuta.
Ky projekt është pjesë e programit kombëtar për Rrugët Lidhëse Rajonale dhe Lokale, i cili ka si qëllim përmirësimin e infrastrukturës rrugore në zonat me potencial ekonomik, duke favorizuar veçanërisht zhvillimin e bujqësisë dhe turizmit, dy prej sektorëve kyç për rritjen dhe punësimin në vend.
