Pas një hetimi të autoriteteve, ka rezultuar se alarmi për bombë në Kuvendin e Kosovës, ishte i rremë. Lajmi konfirmohet nga gazetarja e Klan News, Blerta Dalloshi Berisha. Kryeprokurori i Prokurorisë Themelore në Prishtinë, Zejnullah Gashi, deklaroi për media se alarmi ishte i rremë. Dyshohet se ky mesazh të ketë ardhur nga një person, i gjinisë mashkull, nga një vend jo mike e Kosovës, sipas Gashit.
Sakaq, nuk bëhet me dije se nga cili vend dyshohet se mund të ketë ardhur kërcënimi.
Zëdhënësi i Policisë së Kosovës, Baki Kelani, pas një interesimi të redaksisë tvklan.al, dërgoi qëndrimin zyrtar të autoriteteve atje, ku shpjegon se si është marrë njoftimi për bombë dhe hetimet që po kryhen. Në informacionin zyrtar sqarohet se ditën e sotme, me datë 5 korrik 2025, përmes një mesazhi kërcënues, është njoftuar se ndodhej një mjet shpërthyes në Kuvendin e Kosovës.
Pas këtij mesazhi kërcënues, janë ngritur grupet e posaçme hetimore dhe forcave blu, që kanë bërë rrethimin e institucionit shtetëror dhe kanë evakuuar çdo person nga objekti. Nuk dihet nëse ky kërcënim lidhet me seancat e dështuara të Kuvendit për ngritjen e institucioneve përkatëse në vend, që pas zgjedhjeve parlamentare të 9 shkurtit 2025.
Sakaq, përpjekja e 42-të e Kuvendit do të mbahet mbrëmjen e sotme,në orën 20:00, raporton gazetarja Berisha. /tvklan.al
