Kreu i qeverisë izraelite, Benyamin Netanyahu deklaroi se Izraeli do ta ndalë programin bërthamor të Iranit me ose pa Trump. Kjo deklaratë u bë nga Netanyahu në një intervistë televizive një javë pas sulmeve Izrael- Iran.
“Qëllimi ynë kryesor është të ndalojmë programin bërthamor të Iranit dhe të eliminojmë kërcënimin. Qëllimi i dytë është të ndalojmë kapacitetet balistike të Iranit. Nëse Trump do të marrë pjesë apo jo, kjo është zgjedhja e tij. Ai do të bëjë atë që është më mirë për Shtetet e Bashkuara. Unë do të bëj atë që është më mirë për Izraelin.”
Ndërsa Presidenti francez, Emmanuel Macron, i ka bërë thirrje Izraelit që të ndalojë sulmet ndaj infrastrukturës civile iraniane. Nga panairi i aviacionit në Le Bourget, Macron deklaroi:
“Asgjë nuk justifikon bombardimin e infrastrukturës energjetike dhe civile.” Ai shtoi: “Mendoj se duhet të rifillojë puna politike dhe diplomatike. Duhet t’i jepet përparësi absolut negociatave.”
Gjatë natës së të enjtes, më 13 qershor, Izraeli kreu një sulm të fuqishëm kundër Iranit, pas një periudhe të gjatë tensionesh me përplasje me intensitet të ulët mes dy vendeve. Irani u përgjigj me disa sulme raketore kundër Izraelit. Bombardimet mes të dyja palëve po vazhdojnë pa ndërprerje.
