Ministrja e Infrastrukturës dhe Energjisë, njëherazi edhe zv/kryeministre, Belinda Balluku, mori pjesë në Samitin për Tranzicionin Energjetik që u zhvillua në Athinë të Greqisë. Ky takim mbulonte Europën Juglindore dhe Mesdheun Lindor e në fokus ndër të tjera kanë qenë zhvillimet gjeopolitike të javëve të fundit, që ndikojnë gjithashtu në sektorin energjetik.
Balluku në një mesazh në rrjetet sociale tha se takimi ishte i frytshëm.
“Energjia, ashtu siç e ka treguar prej kohësh është një nga armët më të fuqishme të të gjitha shteteve. Bashkërendimi i politikave, por padyshim edhe planet e përbashkëta për një të ardhme, janë shumë të rëndësishme në këto momente”, tha Balluku.
Balluku bëri me dije se ka diskutuar me skuadrën shqiptare dhe të gjithë partnerët të cilët janë pjesë e projekteve të reja që janë nisur, ashtu siç janë kompanitë italiane sa i përket linjës nënujore të transmetimit, apo dhe kompanitë dhe ministrat nga Azerbajxhani sa i përket projektit të gazifikimit.
“Mbi të gjitha kemi diskutuar për sigurinë energjetike. Siguria energjetike në Europën Juglindore dhe sidomos në Ballkanin Perëndimor janë çelësat e suksesit për të gjithë zhvillimin e agjendës së gjelbër në vazhdim, ashtu siç BE e kërkon”, tha ajo.
Balluku theksoi se Shqipëria ka marrë angazhimet e saj.
“Shqipëria është e angazhuar jo vetëm në infrastrukturë, por edhe energji për ndërtimin e përbashkët të Korridorit VIII, i cili do të lidhë nga ana energjetike, Italinë, Shqipërinë, RMV dhe Bullgarinë”, tha Balluku.
Ajo theksoi se janë zhvilluar bisedime të rëndësishme me ministren e Energjisë britanike.
