Gjykata e Posaçme e Apelit ka miratuar vendimin e Shkallës së Parë për sekuestrimin e apartamentit që ishte në pronësi të kompanisë Agikons dhe që dyshohej se përdorej nga çifti i bashkëshortëve Erion Veliaj dhe Ajola Xoxa.
Ankimin në Apelin e Posaçëm e ka bërë kompania Agikons duke pretenduar se prona është e tyre dhe se nuk ka lidhje me Veliajn. Mirëpo Prokuroria e Posaçme ka pretenduar të kundërtën.
Më 22 Maj, SPAK njoftoi se ekzistojnë të dhëna konkrete që të çojnë në dyshimin për kryerjen e një tjetër vepre penale nga kryebashkiaku i Tiranës Erion Veliaj. Më saktësisht për veprën penale “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Për këtë arsye, Gjykata Kundër Korrupsionit dhe Krimit të Organizuar vendosi sekuestro preventive mbi apartamentin dhe shtesën e tij në pronësi të kryetarit të Bashkisë së Tiranës dhe bashkëshortes së tij.
“Nga të dhënat konkrete të mbledhura deri në këtë fazë të hetimit paraprak, ekziston dyshimi i arsyeshëm i bazuar në prova se shtetasit nën hetim E. V. dhe A. X. kanë interesa pasurore faktike mbi dy pasuri (njëra prej të cilave shtesë pasurie), të cilat janë fqinje me apartamentin që ndodhet në Selitë, (rezidenca Kodra e Diellit), ku aktualisht këta shtetas jetojnë”, thuhej në njoftimin e SPAK.
Ndërkohë Veliaj dhe Xoxa pretendojnë se nuk janë pronarë të pasurisë së sekuestruar dhe nuk kanë asnjë lidhje ligjore apo pasurore me subjektin tregtar në fjalë.
Kujtojmë se Veliaj u arrestua më 10 Shkurt, i akuzuar për dy vepra penale, atë të “korrupsionit pasiv” në 9 raste dhe “pastrim parash”. 2 ditë më vonë, u verifikua masa e “arrestit me burg” ndaj tij në GJKKO, ndërkohë që për bashkëshorten e tij Ajola Xoxa u caktua masa e “detyrim paraqitje” dhe “ndalim i daljes jashtë vendit”./tvklan.al
