Rino Gattuso pritet të jetë trajneri i ri i kombëtares italiane.
Presidenti i Federatës Italiane të Futbollit, Gabriele Gravina, dëshiron ta mbyllë marrëveshjen brenda ditës së nesërme, në mënyrë që emërimi të bëhet zyrtar të hënën dhe prezantimi publik të ndodhë brenda fundjavës së ardhshme.
Gattuso, një figurë e njohur për pasionin dhe energjinë që e karakterizon si trajner dhe ish-lojtar, ka zhvilluar disa biseda me Gravinën në ditët e fundit. Marrëveshja është thuajse e finalizuar dhe mbetet vetëm ratifikimi i saj personalisht.
Kontrata e Gattusos do të jetë në linjë me atë të paraardhësit Luciano Spalletti – një pagë që nuk do të kalojë 2 milionë euro në vit – dhe do të zgjasë deri në përfundim të Kupës së Botës 2026, me shpresën që Italia të kualifikohet në këtë turne madhor.
Përtej emrit të trajnerit, vizioni i ri i Federatës synon të rikthejë frymën e lavdishme të Italisë kampione bote në vitin 2006. Në stafin e ri teknik do të përfshihen emra të mëdhenj si Leonardo Bonucci, Andrea Barzagli, Gianluca Zambrotta dhe Simone Perrotta – ish-lojtarë të respektuar që kanë dhënë shumë për fanellën “azzurre”.
Në rolin e drejtorit sportiv, tashmë është konfirmuar Gianluigi Buffon, një tjetër simbol i suksesit të asaj epoke.
Ndërkohë, në një rol më menaxherial do të përfshihet edhe ish-trajneri Cesare Prandelli. Ai do të ketë në fokus sektorin e të rinjve, duke u kujdesur për zhvillimin e ekipeve të moshave dhe për forcimin e lidhjes mes akademive dhe kombëtares A. Prandelli nuk do të mbivendoset me kompetencat e Gattusos dhe nuk do të ketë rol drejtues mbi të, por do të punojë në harmoni për një vizion të përbashkët afatgjatë për futbollin italian.
