Ish-futbollisti i britanik Jay Emmanuel-Thomas ka pranuar fajësinë për organizimin e trafikimit të 60 kilogramëve kanabis, me vlerë rreth 800 000 dollarë.
Emmanuel-Thomas, i cili ka luajtur më parë për klube të Premier League si Arsenal dhe Ipsëich Town, kishte rekrutuar dy gra për të marrë kanabisin nga Tajlanda dhe për ta transportuar në Mbretërinë e Bashkuar.
Sipas deklaratës së Agjencisë Britanike të Krimeve (NCA), ai ka vepruar si ndërmjetës mes furnizuesve në Tajlandë dhe shpërndarësve të drogës në Britani. Gjyqi ndaj tij në Gjykatën e Chelmsfordit u shty, ndërsa data e dënimit do të konfirmohet më vonë. Ligji në Mbretërinë e Bashkuar parashikon një dënim maksimal deri në 14 vjet burg për trafikimin e kanabisit.
Dy gratë që ai kishte rekrutuar u arrestuan sapo mbërritën nga Bangkoku, por u liruan pasi besonin se po transportonin ar, dhe nuk kishte prova kundër tyre.
Në kohën e arrestimit, 34-vjeçari luante për klubin skocez Greenock Morton, me të cilin kishte nënshkruar një kontratë gjashtëmujore në korrik 2024. Pas arrestimit të tij në shtator, klubi anuloi menjëherë kontratën.
“Kriminelët e organizuar si Thomas përdorin njerëz të zakonshëm për të transportuar kanabis me vlerë të lartë në tregun e zi, por rreziku është shumë i madh dhe nuk ia vlen”, tha David Philips nga NCA për mediat.
Emmanuel-Thomas ishte një produkt i akademisë së Arsenalit dhe më parë ka luajtur për ekipe si Bristol City, QPR dhe Cardiff City.
