Detaje të reja dalin nga vdekja e Olsi Ibros, 45-vjeçari që akuzohej për mashtrimin me mikrokreditë, i cili dyshohet se u vetëhodh mëngjesin e sotëm nga një pallat në ndërtim pranë ish-stacionit të Trenit në kryeqytet.
Dyshohet se pronari i MCA, që u sekuestrua nga Prokuroria e Tiranës ditën e djeshme, ka pirë helm në makinë dhe më pas është ngjitur në pallatin në ndërtim në rrugën “Ramazan Shijaku”, duke i dhënë fund jetës.
Ibro e kishte parkuar automjetin para pallatit ku ndërmori edhe aktin e rëndë dhe më pas ka pirë helm.
Kamerat e sigurisë kanë fokusuar çastet e fundit të jetës së pronarit të MCA, i cili ndodhej i vetëm brenda automjetit.
Pasi dyshohet se ka konsumuar helmin, ai është ngjitur në godinën në ndërtim dhe është vetëhedhur.
Ndërkohë priten rezultatet e ekspertizës mjekoligjore.
