Ministri i Brendshëm, Taulant Balla ka reaguar lidhur me operacionin ku u arrestua shefi i komisariatit në Laç, si edhe u shpallën në kërkim të disa të tjerë, në kuadër të operacionit “Flakë në det”.
Përmes një postimi në rrjetet sociale Balla thotë se do të vijojë intensivisht procesi i vetë-pastrimit të Policisë së Shtetit.
Ai thekson se lufta për spastrimin e vatrave të krimit përballë dhe brenda organizatës së Policisë së Shtetit do ta çojë Shqipërinë në një tjetër nivel të sundimit të ligjit.
“Vijon intensivisht procesi i vetë-pastrimit të Policisë së Shtetit. Policia e Shtetit në bashkëpunim me SPAK kanë arrestuar sot pasdite Shefin e Komisariatit të Policisë Kurbin, i cili dyshohet për bashkëpunim me drejtuesit e një grupi kriminal, ndaj të cilëve janë lëshuar gjithashtu urdhra arresti.
Forcimi i bashkëpunimit mes agjencive ligjzbatuese dhe lufta e përbashkët për spastrimin e vatrave të krimit përballë dhe brenda vetë organizatës së Policisë së Shtetit, do ta çojë Shqipërinë në një tjetër nivel të sundimit të ligjit”, shkruan Balla në rrjetet sociale pak minuta pas operacionit të bujshëm, detajet e të cilit u bënë publike nga Drejtori i Përgjithshëm i Policisë së Shtetit Muhamet Rrumbullaku./Opinion.al
