Një sulm rus me dron ka goditur objektet portuale në jug të rajonit Odesa të Ukrainës, duke shkaktuar zjarre, thonë autoritetet.
Një kapanon gruri dhe infrastruktura portuale u dëmtuan, thanë autoritetet, pa zbuluar se cili port u godit.
Forcat ajrore të Ukrainës thanë më herët se dronët po shkonin drejt lumit Danub, ku Ukraina ka porte përgjatë kufirit me shtetin e NATO-s, Rumaninë.
Rusia filloi të synojë portet e Ukrainës pasi braktisi një marrëveshje të OKB-së për grurin.
Marrëveshja, e ndërmjetësuar një vit më parë, kishte nënkuptuar që eksportet ukrainase dhe ruse mund të transportoheshin të sigurta përmes Detit të Zi.
Udhëheqësi rajonal i Odesa-s, Oleh Kiper tha se shërbimet e urgjencës po punonin në vendin e sulmit dhe se nuk kishte raportime për ndonjë viktimë. Ai shtoi se informacione të mëtejshme do të jepen nga ushtria ukrainase.
Komanda ushtarake e Ukrainës në jug tha se mbrojtja ajrore kishte funksionuar për gati tre orë. Presidenti Volodymyr Zelensky tha se “për fat të keq ka pasur dëme”, në Ukrainën jugore.
Pas tërheqjes nga marrëveshja e grurit, Rusia kërcënoi se do të synonte çdo anije që shkonte drejt porteve të Detit të Zi të Ukrainës – duke vendosur de fakto një bllokadë detare./Opinion.al
