Teksa jemi në nisje të sezonit turistik policia ka zhvilluar kontrolle në të gjithë vijën bregdetare, ndaj mjeteve lundruese, kryesisht ndaj atyre të argëtimit, për të verifikuar nëse kanë zbatuar ligjin dhe rregullat e lundrimit.
Në një njoftim për mediat, policia bën me dije se janë zhvilluar kontrolle nga Saranda në Shëngjin dhe si rrjedhojë janë bllokuar 8 mjete lundruese.
Konkretisht janë bllokuar në zonën e quajtur “Shkëmbi i Kavajes”, Durrës, një mjet argëtimi “Jet Ski”, që lundronte jashtë zonës së përcaktuar dhe ishte rrezik potencial për sigurinë e pushuesve. Drejtuesi i tij u ndëshkua me gjobë100 000 lekë të rinj;
Në afërsi të portit të Durrësit, u bllokuan 2 mjete të tjera lundruese argëtimi “Jet Ski” që drejtoheshin pa dokumentacion e nevojshëm në bord, Secili prej drejtuesve të tyre u ndëshkua me gjobë 10 000 lekë të rinj;
Në zonën e quajtur “Currilat”, Durrës, u bllokuan 2 mjete lundruese gomone që drejtoheshin pa dokumentacion e nevojshëm në bord. Secili prej drejtuesve të tyre u ndëshkua me gjobë 10 000 lekë të rinj;
Në Dhërmi u bllokua 1 mjet lundrues argëtimi “Jet ski”, drejtuesi i të cilit kreu manovra të rrezikshme në det dhe për pasojë ishte rrezik potencial për sigurinë e pushuesve;
Gjithashtu në Dhërmi u bllokua 1 mjet lundrues Skaf, pasi drejtuesi i tij e ushtronte veprimtarinë e lundrimit, i palicencuar. Për këtë shkelje, ky shtetas u ndëshkua me gjobë 100 000 lekë të rinj;
Në Sarandë u bllokua 1 tjetër mjet lundrues argëtimi “Jet Ski”, që drejtohej pa dokumentacionin e nevojshëm në bord. Drejtuesi i tij u ndëshkua me gjobë 10 000 lekë të rinj.
