Zbardhet dëshmia e pronarit të mjetit që iu vendos eksploziv mbrëmjen e së premtes në Vlorë. Mësohet se 30 vjeçari Endrit Sadedini ka deklaruar në polici se nuk ka konflikte me askënd dhe nuk ka marrë kërcënime. Deri tani policia ka shoqëruar 7 persona për t’i marrë në pyetje si dëshmitarë në vendngjarje.
Mjeti i Sadedinit është ende në policinë e Vlorës, e cila po e kontrollon për të gjetur ndonjë gjurmë të mundshme. Kamerat e sigurisë së një lokali që ndodhet pranë parkingut tek zona e Ujit të Ftohtë në Vlore ku ishte makina e Sadedinit kanë fiksuar një person. Mendohet se ai është autori që lëviz pranë pallatit i pamaskuar, por nuk dallohet qartë për shkak të errësirës.
Forcat xhenierë mbrëmjen e vonë të së premtes bënë shpërthimin e kontrolluar të 500 gr eksploziv të vendosur para mjetit të 30 vjeçarit.
Ishte vete i riu i cili njoftoi policinë për kallëpin e mbuluar me letër natriban që kishte gjetur afër makinës tip Benz me targa AA 233 OX. Në pako ishte lëndë eksplozive e bërë në mënyre artizanale me peshë 500 gram dhe ishte planfikuar të shpërthehej me celular. Endrit Sadedini është pronari i një lokali në Vlorë ku në prill të këtij viti u vra një person dhe u plagosën tre të tjerë.
Për këtë ngjarje ai është proceduar në gjendje të lirë për moskallëzim krimi megjithëse lokalin e kishte lënë me qera. Ndërkohë vazhdojnë hetimet për zbardhjen e shkaqeve të vendosjes së eksplozivit në mjetin e Endrit Sadedinit.
