Kryeministri Edi Rama ka reaguar për ndeshjen që do të zhvillohet mbrëmjen e nesërme mes Shqipërisë dhe Italisë në Gjermani.
Nëpërmjet një postimi në rrjetet sociale, kreu i qeverisë ka komentuar shifrën e lartë prej 50 mijë shqiptarësh që do të jenë nesër në stadiumin e Dortmundit.
Më tej, Rama thotë se kombëtarja shqiptare tashmë e ka fituar kampionatin e saj Europain dhe nuk ka asgjë për të humbur.
Postimi i Ramës
Natyrisht 50 mijë shqipe dhe 31 mijë azzuri në shkallët e arenës së Dortmundit nesër, ku i famshmi Mur i Verdhë i Borussias do të zëvendësohet për një natë nga Dallga Kuqezi e Shqipërisë. Shqipëria e ka fituar Europianin e saj dhe s’ka më asgjë për të humbur, prandaj cilidoqoftë rezultati i ndeshjes mbrëmja e nesërme do të mbetet jo vetëm në historinë e futbollit shqiptar, po edhe në kujtesën e 10 milionë shqiptarëve.
