Ministri i Financave, Petrit Malaj, foli me shifra sot në Kuvend sa i takon situatës ekonomike të vendit tonë në gjysmën e parë të këtij viti.
“Totali i shpenzimeve, deficiti buxhetor dhe niveli i borxhit publik mbeten plotësisht të pandryshuara duke siguruar vazhdimësinë e qëndrueshmërisë fiskale dhe përmbushjen e angazhimeve tona për një menaxhim më efikas e transparent të financave publike”, u shpreh ai.
Më tej, rreshtoi treguesit fiskalë Janar-Maj 2025, si më poshtë:
Të ardhurat totale për periudhën 5-mujore të këtij viti, arritën në 305.92 miliardë lekë me një realizim prej 100,2% të planit të periudhës. Krahasuar me të njëjtën periudhë të vitit të mëparshëm u mblodhën rreth 187 milionë euro më shumë. Në terma vjetore, të ardhurat totale për këtë 5-mujor, u realizuan në masën 40.4%.
Të ardhurat e arkëtuara nga tatimet dhe doganat
Janë realizuar në masën 203.4 miliardë lekë ose 1.7 miliard lekë më shumë se sa plani i periudhës. Krahasuar me Janar-Maj 2024, janë mbledhur 198 milion euro më shumë, ose 10.8%.
Të ardhurat tatimore të mbledhura nga administrata doganore
U realizuan në vlerën 92.7 miliardë lekë ose 3 miliard lekë më shumë se sa periudha e vitit të shkuar.
Të ardhurat tatimore të mbledhura nga administrata tatimore
110.8 miliardë lekë ose 16.8 miliardë lekë apo 168 milion euro se sa periudha Janar-Maj 2024. Nëse do bëjmë një krahasim me planin e periudhës, janë mbledhur 53 milion euro më shumë se sa kishim planifikuar
Të ardhurat nga fondet speciale
73.5 miliardë lekë ose 8 miliardë lekë më shumë se e njëjta periudhë e vitit të shkuar.
Shpenzimet e përgjithshme publike
267.1 miliardë lekë me një realizim në masën 96% të planit të periudhës, ndërsa krahasuar me të njëjtën periudhë të vitit 2024, rezulton me 12.8% më shumë.
Shpenzimet kapitale
22.8 miliardë lekë, 9.7% më i lartë se vitin e shkuar, ose 20 milion euro më shumë.
Për ecurinë ekonomike, theksoi se ka një ritëm të qëndrueshëm prej 3.9%.
Kjo rritje sipas ministrit vjen prej disa faktorëve. Së pari është forcuar konsumi familjar, së dyti ka dinamikë të qëndrueshme të investimeve publike dhe private si dhe performanca e jashtëzakonshme e sektorit të turizmit.
“Ky nivel rritjeje reflekton edhe përmirësimin e klimës së të bërit biznes si dhe tërheqjen e investimeve të huaja”, përfundoi Malaj. /tvklan.al
