Pesë persona nga Bajza kanë mbetur të bllokuar në borë në zonën e Fushës së Zezë në Malësi të Madhe.
Mësohet se një nga djemtë është sëmurë dhe të rinjtë kërkojnë ndihmë pasi ndodhen në një distancë të largët nga automjetet e tyre.
Drejt Fushës së Zezë janë nisur ambulanca dhe grupe të forcave speciale të FNSH-së.
Të rinjtë kishin shkuar në këtë zonë për rrëshqitje me ski në dëborë. FNSH në Shkodër në bashkëpunim me policinë e Malësisë së Madhe kanë nisur një operacion shpëtimi prej dy orësh.
Forcat e ndërhyrjes së shpejtë kanë arritur në vendin ku ndodhen të rinjtë duke përshkuar rrugën në këmbë.
Një nga djemtë ka shqetësime shëndetësore, por pa rrezik për jetën, ndërsa të tjerët janë mirë. Momentalisht të rinjtë janë strehuar në një stan veror derisa të mbërrijnë grupet e gatshme të policisë me automjete.
Duhen së paku 5 orë që ky operacion të përfundojë por e rëndësishme është që të rinjtë kanë kontakte përmes celularit me policinë.
