Pasditen e sotme kryetari i PD, Sali Berisha ka zhvilluar një takim me drejtuesit politik të qarqeve. Mësohet se në fokus të kësaj mbledhje ka qenë zhvillimi i protestës së 11 shkurtit para kryeministrisë.
Në përfundim të mbledhjes, kryedemorkati kërkoi largimin e menjëhershëm të kryeministrit Edi Rama, të cilin e akuzoi si të përfshirë në afera korruptive dhe se ka bashkëpunuar me ish-zyrtarin e FBI, McGonigal.
Kreu i demorkatëve tha se nëse Rama nuk largohet, qytetarët do e hedhin atë në lumin Lanë. Berisha shtoi se protestat do të vijojnë deri në mosbindej civile.
“Të largojmë me çdo kusht nga pushteti, këtë demon të pushtetit i cili për të shkatërruar pluralizmin dhe konsoliduar karrigen e tij nuk ndalet para asnjë akti. Nuk njeh asnjë kufi, nuk njeh asnjë normë morale, asnjë standard, ligj, kombëtar apo ndërkombëtar. Edi Rama duhet të largohet një minutë e më parë, përndryshe, qytetarët shqiptarë do ta hedhin në Lanë, përndryshe, qytetarët shqiptarë do të rivendosin reputacionin, dinjitetin, moralin e tyre. Kurrë ndonjëherë që nga koha e Enver Hoxhës, dinjiteti i këtij kombi, këtij vendi nuk është poshtëruar në këtë mënyrë. Kjo është njëra anë e medaljes. Ana tjetër e medaljes është se ky akt korruptiv u ndërmorr me qëllimin e vetëm për shkatërrimin e pluralizmit dhe demokracisë në Shqipëri. Demokraci pa pluralizëm nuk ka, pa opozitë nuk ka, dhe faktikisht me para droge dhe para të tjera, ky përpiqet në të gjitha mënyrat për të konsoliduar monizmin e tij. Largimi i Edi Ramës me të gjitha mjetet demokratike, përfshirë mosbindjen civile është sot misioni i të gjitha misioneve të qytetarëve shqiptarë, të popullit opozitar”,-tha Berisha.
