Ambasadori i Bashkimit Europian në Shqipëri Luigi Soreca ka reaguar pas krijimit të dy grupeve të reja parlamentare në Kuvend. Ai ka thënë se BE pret që kjo opozitë të shkojë në zgjedhje lokale dhe të bisedojë me palët e veta.
“Ne shpresojmë që opozita do të marrë pjesë në zgjedhjet lokale. Ne kërkojmë që opozita të jetë prezente. Tani është koha për dialog. Opozita duhet të flasë mes vetes dhe me qeverinë në mënyrë që të kemi pjesëmarrje”, shprehet Soreca.
Kjo deklaratë erdhi pas fjalës së Rudina Hajdarit në Parlament, e cila në statusin e kryetares së grupit të PD-së tha se ishte kundër bojkotit të zgjedhjeve. Hajdari u shpreh se megjithëse koha është në disfavor, do të punohet për t’i dhënë shqiptarëve një alternativë, duke paralajmëruar pjesëmarrjen në zgjedhje të një fraksioni të opozitës.
Ndërkohë, kryetari i Partisë Demokratike Lulzim Basha ka thënë se opozita nuk do të marrë pjesë në zgjedhjet lokale dhe se ato nuk do të mbahen në 30 qershor./Opinion.al
