Kreu i Partisë Demokratike, Lulzim Basha ka përkujtuar sot masakrën e 2 prillit në Shkodër.
29 vite më parë në Shkodër nisi një nga revoltat më të mëdha popullore kundër regjimit komunist. Pas zgjedhjeve të marsit të vitit 1991, Partia e Punës vijonte të ishte në pushtet. Kjo bëri që turma njerëzish të revoltuar të mblidheshin si fillim në sheshin para Komitetit Qëndror në Shkodër (sheshi tani njihet me emrin 2 Prilli) dhe më pas të mësynin godinën duke grisur, djegur dhe hedhur dokumentet që gjetën aty.
Forcat e regjimit ndërhynë me dhunë për të shtypur revoltën duke lënë të vdekur 4 të rinjtë Bujar Bishanaku, Arben Broci, Nazmi Kryeziu dhe Besnik Ceka të cilët sot janë shpallur martirë të demokracisë. Kjo ngjarje njihet si masakra e fundit e komunizmit në Shqipëri.
“Sot përulemi me nderim para kujtimit të Arben Brocit, Nazmi Kryeziut, Besnik Cekës dhe Bujar Bishanakut, 4 të rinjve shkodranë që u flijuan në altarin e lirisë dhe demokracisë. Sakrifica e tyre tregon se liria dhe demokracia nuk kanë çmim. Lavdi përjetë dëshmorëve të 2 prillit!”, shkruan Lulzim Basha në mesazhin e tij përkujtimor për këtë ngjarje dhe dëshmorët e saj. /Opinion.al
Sot përulemi me nderim para kujtimit të Arben Brocit, Nazmi Kryeziut, Besnik Cekës dhe Bujar Bishanakut, 4 të rinjve shkodranë që u flijuan në altarin e lirisë dhe demokracisë. Sakrifica e tyre tregon se liria dhe demokracia nuk kanë çmim. Lavdi përjetë dëshmorëve të 2 prillit! pic.twitter.com/OOXVRDJBLH
— Lulzim Basha (@lulzimbasha_al) April 2, 2020
