Partia Socialiste ka bërë dy kërkesa drejtuar PD dhe Policisë së Shtetit në Komisionin Hetimor për zgjedhjet e 25 prillit, lidhur me “strukturën e mbrojtjes së votës”.
Zëvendëskryetari i Komisionit, Tonin Gogu, deputet i PS-së kërkon informacion nga selia blu lidhur me ngritjen dhe skemën e funksionimit të kësaj strukture.
Nga Policia e Shtetit, PS kërkon informacion nëse kjo strukturë ka pasur bashkëpunim me uniformat blu, dhe në sa ngjarje është përfshirë ajo gjatë zgjedhjeve të 25 prillit.
Tonin Gogu: Kërkesa e parë është për Partinë Demokratike dhe kryetarin e saj, Lulzim Bashën. Kërkojmë informacion të plotë dhe të detajuar. Kur është themeluar struktura e mbrojtjes së votës. Me çfarë platforme, cili është akti që e ka themeluar strukturën në fjalë dhe kush e ka nënshkruar atë. Si janë organizuar nga qendra e partisë deri në bazë. Cila ka qenë skema organizative e strukturës, si është financuar. Mbi cilat kritere është bërë zgjedhja e drejtuesve, s aka qenë numri i anëtarëve. Kush ishte drejtuesi i çdo qendre. Si është organizuar veprimtaria e tyre. A është analizuar nga strukturat e PD veprimtaria e strukturës së mbrojtjes së votës. A janë analizuar incidentet për këtë strukturë. A ka pasur shkelje të ligjit nga këta anëtar. A ka pasur përpjekje nga drejtuesit e strukturave drejtuese për korrigjimin apo konstatimin e akteve të kundraligjshme. A egziston sot, a vazhdon të jetë e ngritur struktura e mbrojtjes së votës.
Kërkesa e dytë i drejtohet Policisë së Shtetit dhe kreut, Gledis Nanos. A ka qenë në dijeni policia e Shtetit për ngritjen e strukturës për mbrojtjen e votës. A është informuar nga institucione të tjera mbi ngritjen e kësaj strukture. Sa është numri i regjistruar i ngjarjeve për votat në policinë e shtetit. Sa prej tyre ngjarje është përfshirë struktura e mbrojtjes së votës. Ku kanë ndodhur ngjarjet në fjalë. Cilat prej ngjarjeve janë kallëzuar nga kjo strukturë. A ka patur ndonjë bashkëpunim mes kësaj strukture me Policinë e Shtetit. Nëse po, kush kanë qenë personat e kontaktit me policinë. Gjatë hetimeve, a ka rezultuar se personat e përfshirë në ngjarje kanë qenë të armatosur, dhe sa prej tyre janë përfshirë element nga struktura e mbrojtjes së votës.
Enkelejd Alibeaj: Juve bëtë dy kërkesa, është e drejta juaj. Doja të sqaroja në aspektin juridik, këto janë kërkesa për informacion? Kërkesë për t’i thirrur si dëshmitar? Nëse është kërkesë për të administruar dokumente, kërkesa i drejtohet institucioneve shtetërore. Nëse do t’i thërrisni si dëshmitar, duhet të riformuloni kërkesën. Nëse janë pyetje, janë e drejta juaj. Çdo kërkesë miratohet pa asnjë votim. Thjesht për të orientuar punën.
Tonin Gogu: Për sqarim, Meqënëse kërkesa jonë në këtë komision, juve duhet ta kuptoni çfarë kërkojmë ne kur të shihni lëndën e kërkesës. Është thjesht kërkesë për informacion, drejtuar institucioneve.
Ferdinand Xhaferraj: Në dy kërkesat që shteroi zoti Gogu nga Partia Socialiste, përmendet mbi 40 herë Partia Demokratike. Kjo do të thotë që gjatë gjithë kohës ka qenë në mbrojtje të votës së qytetarëve shqiptarë.
Enkelejd Alibeaj: Duhet të bindemi që çdo kërkesë që bëhet të pranohet pa votim. Është e drejta e çdo deputeti për lëndën që kërkon të trajtojë problematikën që ngre.
