Sekretari i Përgjithshëm i Partisë Demokratike ka reaguar pasi policia ka shoqëruar disa prej anëtarëve të PD. Sipas Bardhit, anëtarët të grupeve të sesioneve, anëtarë të këshillit kombëtarë dhe kryetarë të degëve të PD janë shoqëruar nga policia pasi kanë dalë nga selia blu.
Para mediave, Bardhi tha se janë rreth 20 demokratë të shoqëruar nga policia e Ramës. Ndër të tjera ai tha se demokratët e shoqëruar kanë qenë në mbledhje me Bashën ditën e sotme.
Bardhi iu afrua disave prej efektivëve të Policisë së Shtetit që ndodheshin në oborrin e PD dhe kërkoi të dinte se pse janë shoqëruar kolegët e tij.
Efektivët e policisë preferuan mos të jepnin informacione, duke i thënë sekretarit të PD që t’i drejtohet zyrës së shtypit për më shumë informacione.
Debati mes sekretarit të Përgjithshëm të PD, Gazmend Bardhit dhe efektivit të policisë në selinë e PD:
Bardhi: Kush është shefi juaj? Ju lutem më thoni, shkoj te hyrja më thonë shko atje, vij këtu më thonë, shko atje.
Polici: Nuk jemi ne ai autoritet. E di shumë mirë ti, mirupafshim.
Bardhi: Detyrën ti nuk e bën dot në shkelje të ligjit. Pse po bëni ndalime?
Polici: Edhe sot je i paqartë përse janë shoqëruar në komisariat?
Bardhi: Ne kemi qenë në një mbledhje pune, ju nuk keni qenë, secili është kontrolluar në prezencë të prokurorëve. A mund të ma jepni edhe mua arsyet?
Polici: Besoj për të sqaruar rrethanat e ngjarjes së sotme. Drejtohu për informacion zyrës së shtypit.
Bardhi: Për çfarë po qëndroni këtu?
Polici: Vazhdo fol, ne jemi në punën tonë.
Bardhi: Kush është puna juaj? Çfarë po bëni tani në oborrin e PD-së? Është pronë e PD-së, përse jeni tani në një pronë që nuk mund të hyni?
Polici: Nuk të jap asnjë deklaratë. Ne do të ikim kur duam ne dhe jo ju.
