Pesë shqiptarë anëtarë të një bande droge janë arrestuar nga zyrtarët e doganave dhe oficerët e policisë së Berlinit.
Ata akuzohen se kanë kontrabanduar 136 kilogramë marijuanë në Gjermani, vlera e së cilës është rreth një milion euro.
Sipas mediave të huaja burrat shqiptarë të moshës 50, 40, 38, 27 dhe 22 vjeç donin të ngarkonin bimë kanabisi pranë një magazine në Velten në veri të Berlinit dhe t’i përgatisnin për rishitje.
Por hetuesit nga dogana dhe policia kishin vëzhguar prej kohësh bandën dhe kishin përgjuar telefonat e tyre. Kur kamioni i drejtuar nga 50-vjeçari u ngjit në pronë, katër burrat e tjerë që prisnin aty filluan të shkarkojnë drogën nga rimorkio në një automjet tjetër. Ka qenë ky momenti kur u arrestuan nga autoritetet.
Zyrtarët konfiskuan 32,990 euro para në automjetin ku po ngarkoheshin bimët narkotike, që besohet se kanë ardhur nga shitja e drogave të tjera.
Gjykata lëshoi urdhra arresti për të pesë burrat. Sipas raportimeve, policia është në kërkim të anëtarëve të tjerë të bandës ndërkombëtare.
