Ndërsa në Shqipëri debati më i madh politik është reforma në drejtësi dhe pikërisht ligjet për vetingun, tjetër standard po kërkohet të përdoret nga Qeveria për të dërguarin e vendit tonë në Gjykatën Evropiane të të Drejtave të Njeriut në Strasburg.
Opiniona.al ka arritur të zbardhë debatin në mbledhjen me dyer të mbyllura të Këshillit të Ministrave ku është diskutuar mbi caktimin e kandidatëve për gjykatës në Strasburg. Tre kandidaturat nga Shqipëria duhet të dërgohen në Këshillin e Europës deri më datë 26 gusht. Këto kandidatë do të shqyrtohen nga parlamenti i Këshillit të Europës dhe njeri prej tyre do zgjidhet si pasues i Ledi Biankun në këtë detyre të rëndësishme.
Aktualisht në Kryeministri, pranë Zyrës së Sekretarit të Përgjithshëm është hapur një konkurs për përzgjedhjen e këtyre kandidaturave.
Duke iu rikthyer debateve në mbledhjen e Qeverisë, Opinion.al arriti të mësojë se një nga përfaqësuesit e Këshillit të Ministrave ngriti shqetësimin e kandidaturave të dobëta që dërgohen atje. Kujtojmë se 3 vite më parë britanikja “Daily Mail”, pati shkruar se përfaqësuesi ynë Ledi Bianku është një nga gjyqtarët pa eksperiencë, ndër më të dobëtit në Strasburg, pasi nuk ka punuar kurrë si gjyqtar.
Nga ana tjetër gjatë kësaj mbledhjeje është kërkuar për gjyqtarët që dërgohen në Këshillin e Europës ti nënshtrohen procesit të Vettingut, pasi ku proces kërkohet të bëhet edhe për gjyqtarët brenda vendit. Por, ka qenë një zyrtar i lartë i aparatit kryeministror që ka ndërhyrë duke thënë se “nuk ka kohë për Vetting pasi jemi në limitet kohore, kandidaturat duhen dorëzuar deri më 20 gusht”, ka thënë ai. Edhe Rama e ka mbështetur këtë ide.
Opinion.al u interesua pranë zyrës për mediat në KM si dhe në Ministrinë e Drejtësisë për të mësuar më shumë detaje rreth këtij procesi.
Kush janë 3 kandidaturat që do të shkojnë nga Shqipëria për në Gjykatën e Strasburgut?
A do ti nënshtrohen ato Vettingut?
Cili është profili i tyre?- Këto dhe të tjera pyetje presin një përgjigje nga Kryeministria pasi Ministria e Drejtësisë, na u përgjigj shkurt se “nuk ka informacion dhe është me pushime”.
/Opinion.al
