Presidentja e Komisionit Evropian Ursula von der Leyen dhe presidenti i Këshillit Evropian Charles Michel, nënshkruan marrëveshjen që rregullon Brexit-in, apo largimin e Mbretërisë së Bashkuar nga BE-ja, gjatë javës së ardhshme.
Ceremonia e nënshkrimit që është hapi i parafundit në Brexit u zhvillua pa praninë e mediave.
“Gjërat do të ndryshojnë në mënyrë të pashmangshme, por miqësia jonë do të mbetet. Ne do të nisim një kapitull të ri si partnerë dhe aleatë”,– tha Michel në një postim në Twitter.
Komisioni Evropian dhe Këshilli Evropian refuzuan kërkesat e vazhdueshme të mediave për të marrë pjesë në ceremoninë e nënshkrimit.
“Charles Michel dhe unë sapo nënshkruam Marrëveshjen e Tërheqjes së Mbretërisë së Bashkuar nga Bashkimi Evropian, duke i hapur rrugë ratifikimit të saj në Parlamentin Evropian”, –shkroi Von der Leyen në Twitter.
Parlamenti Evropian pritet t’a ratifikojë marrëveshjen për Brexit më 29 Janar, duke i hequr Britanisë edhe pengesën e fundit për dalje nga blloku, që pritet më 31 janar.
Qytetarët britanikë kanë vendosur për Brexit-in në një referendum të mbajtur në vitin 2016. Pas 31 Janarit do të nisë edhe periudha e tranzicionit, e cila do t’iu japë palëve kohë së paku deri më 31 Dhjetor 2020, për të negociuar marrëdhënien e ardhshme.
Marrëveshja që specifikon detajet ligjore e largimit të Britanisë nga BE-ja përfshin më shumë se 500 faqe.
