Zyrtare/ FSHF: Ndeshja me Izraelin luhet në “Loro Boriçi”

Ndeshja e 12 nëntorit mes Shqipërisë dhe Izraelit, për eliminatoret e Kampionatit Botëror të Futbollit “Rusi 2018”, do të luhet sipas parashikimit në stadiumin “Loro Boriçi”, të qytetit të Shkodrës. Lajmi është bërë i ditur nga FSHF, duke konfirmuar edhe rihapjen e stadiumit që u mbyll pak ditë më parë. “Të gjitha lajmet për të kundërtën apo që ndeshja do të luhet në Elbasan, janë të pavërteta dhe pa asnjë konfirmim zyrtar apo deklaratë të dalë nga institucioni shqiptar i futbollit. FSHF, rikonfirmon se ndeshja do të luhet në stadiumin e Shkodrës dhe kjo gjë nuk është vënë asnjëherë në dyshim. Gjithashtu njoftohet se shitja e biletave, vazhdon normalisht”, thuhet në njoftimin e FSHF-së. Mediat shkruajtën se ndeshja rrezikonte të mos luante në impiantin e Shkodrës për shkak të rregullimeve në fushë. Ajo pësoi dëmtime nga 3 ndeshjet e fundit.