Real Madridi dhe Atletico Madridi nuk mund të transferojnë lojtarë në dy afatet e ardhshme të merkatos. Po, kjo nuk është shaka, por një vendim i porsabërë zyrtar nga institucioni më i lartë i futbollit, FIFA. Klubet madrilene nuk do të mund të nënshkruajnë me asnjë futbollist në verën e vitit 2017 dhe janarin e vitit 2018. Arsyeja e këtij dënimi janë parregullsitë në transferimin e lojtarëve minorenë. Komiteti i Apelit të FIFA-s ka aplikuar të njëjtin dënim si të Barcelonës në vitin 2015, me të njëjtin shkak dhe masë ndëshkimore.
Sapo është informuar për këtë vendim, Real Madridi ka reaguar me një komunikatë zyrtare, ku shpreh indinjatën e vet dhe paralajmëron se do të apelojë edhe më lart. “Duke marrë parasyshë vendimin e Komitetit të Apelit të FIFA-s, Real Madridi dëshiron të shprehë se vendimi i marrë nga ky organ është i padrejtë dhe kundërshton principet elementare të të drejtave tona. Klubi do të formulojë një apel tjetër pranë Gjykatës së Arbitrazhit Sportiv (TAS). Real Madridi shprehet thellësisht i indinjuar nga ky vendim dhe e sheh si diçka urgjente apelimin në TAS me shpresën se vendimi do të jetë i drejtë”, – shkruhet në sajtin zyrtar të “Los Blancos”-ve.
