Në një fjalim historik para deputetëve britanikë në Ëestminster, zonja e parë e Ukrainës, Olena Zelenska i bëri thirrje Mbretërisë së Bashkuar të ndihmojë në vendosjen e drejtësisë për Ukrainën.
“Fitorja nuk është e vetmja gjë që na duhet, ne kemi nevojë për drejtësi”, u shpreh Olena Zelenska.
Pas komenteve të kryeparlamentarit Lindsay Hoyle, ajo thotë se ukrainasit po kalojnë një terror të ngjashëm me atë të përjetuar nga Britania e Madhe në Luftën e Dytë Botërore, kur Gjermania naziste bombardoi qytetet.
Sipas saj do të ishte e paimagjinueshme që nazistët të mos ishin përballur me drejtësinë pas luftës, ndërsa e shton se e njëjta gjë duhet bërë edhe për Rusinë.
Zelenska i kërkoi Mbretërisë së Bashkuar të ndihmojë në ngritjen e një “gjykate speciale” kundër Rusisë për ta mbajtur atë “përgjegjëse për krimin e luftës dhe terrorit”.
Ajo thotë se Britania e Madhe mund të bëhet një lider botëror për këtë çështje.
Duke përshkruar ndërprerjet e fundit të energjisë me të cilat u përball Ukraina, ajo thotë se kirurgët u lanë duke kryer operacione në errësirë, shërbimet e transportit u ndalën dhe komunikimi u bë i vështirë.
Ajo përshkruan gjithashtu akte të tmerrshme të dhunës seksuale të dyshuara të kryera nga trupat ruse, duke përfshirë përdhunimin e një vajze katërvjeçare.
Në Kherson, zonja Zelenska thotë se forcat ruse janë ende duke kryer “sulme të planifikuara, mizore” ndaj civilëve, shkollave dhe spitaleve.
Ajo thotë se këto urdhra do të kishin ardhur nga udhëheqja e lartë ruse.
Ndërkohë, ajo thotë se 200,000 km të Ukrainës mbeten të mbuluara me mina dhe municione të pashpërthyera të lëna pas nga trupat ruse.
Teksa përfundon fjalimin e saj, deputetët mes të cilëve edhe ish-kryeministri Boris Johnson ngrihen dhe e duartrokasin raportojnë mediat e huaja./Opinion.al
