Zjarri në ishullin Maui në Hawaii, me një numër të përkohshëm të vdekjeve prej 96, është zjarri më vdekjeprurës në historinë e SHBA-së që nga viti 1918, kur 453 njerëz vdiqën në Minesota dhe Wisconsin.
Sipas mediave të huaja, numri i të vdekurve në arkipelagun tropikal ka tejkaluar atë të Camp Fire, zjarrit të vitit 2018 në Kaliforni që praktikisht zhduku qytetin e vogël të Paradise nga harta dhe vrau 86 njerëz. Por numërimi i të vdekurve sapo ka filluar dhe autoritetet parashikojnë se numri përfundimtar do të jetë shumë më i rëndë.
Sipas autoriteteve, janë ende një mijë të zhdukur dhe vetëm 3% e zonës së shkatërruar nga flakët deri më tani është kërkuar, madje edhe me ndihmën e qenve të shpëtimit. Shefi i policisë në Maui, John Pelletier, ka ftuar popullatën t’i nënshtrohen analizave të ADN-së, për të përshpejtuar identifikimin e vështirë.
Ndërkohë, autoritetet lokale dhe shtetërore janë në qendër të polemikave për reagimin ndaj zjarreve që kanë shkatërruar qytetin e Lahinës. Sipas rikonstruksioneve të para, alarmet paralajmëruese në celularët kishin nisur vonë, ndërsa sirenat sistemi i të cilave konsiderohet ndër më të zhvilluarat në Shtetet e Bashkuara dhe më të mëdhenjtë në botë nuk ishin ndezur.
Sipas raportimeve, asnjë nga sirenat nuk u ra kur zjarri i parë shpërtheu të martën.
Shteti i Hawaii thuhet se dërgoi pesëmbëdhjetë alarme për telefonat celularë duke përdorur sistemin e tij të integruar, por ndoshta jo në kohën e duhur. Guvernatori, demokrati Josh Green, pranoi se nuk ishte i sigurt nëse sistemi i paralajmërimit të Maui-t funksiononte siç duhet./Opinion.al
