Një zjarr i madh ka përfshirë pyllin me pisha në fshatin Patin të Klosit. Flakët janë përhapur me shpejtësi si pasojë e erës duke djegur rreth 1 hektar pisha.
Të parët që kanë ndërhyrë shuarjen e flakëve kanë qenë banorët e zonës. Me mjete rrethanore ata janë përpjekur të izolojnë zjarrin për të mos u përhapur në zonat e banuara.
Më pas në vendngjarje kanë mbërritur zjarrfikësit e Bashkisë së Klosit. Mungesa e rrugëve automobilistike ka bërë që zjarrfikësit të përdorin pompa shpine për shuarjen e flaktëve dhe tashmë bëhet e ditur se vatra është neutralizuar duke ndalur rrezikun e përhapjes së mëtejshme.
Situata problematike me vatrat e zjarrit ditën e sotme ka patur në disa zona të vendit. Më herët gjatë ditës është raportuar se në malin me pisha të Shëngjinit flakët kanë përfshirë zonën që prej mbrëmjes së djeshme. Raportimet e fundit bëjnë me dije se flakët i janë afruar tashmë zonave të banuara.
Një zjarr i madh ka rënë gjithashtu edhe në malin e Shëndëllisë në kufirin mes bashkisë së Memaliajt dhe asaj të Tepelenës. Si pasojë e zjarrit kanë shpërthyer edhe disa predha të Luftës së Dytë Botërore por fatmirësisht pa rrezik për banorët.
Presidenti i Republikës i bëri sot thirrje të gjithave institucioneve kompetente që të koordinohen në kohë dhe të marrin masat e nevojshme për të vënë nën kontroll zjarret. Ai u shpreh se përpos mbrojtjes së mjedisit, ajo çfarë është më e rëndësishme është mbrojtja e jetëve të qytetarëve. /Opinion.al
