Ksamili është tronditur ditën e djeshme nga një ngjarje e rëndë, ku pas një konflikti për motive të dobëta mësohet se një punonjës i cili kishte konflikte me pronaren e lokalit ku punonte, është rrahur keqazi me mjete të rënda nga dy vëllezërit e saj.
Punonjësi i keqtrajtuar është identifikuar si Artur Murataj, 42 vjeç, banor i Ksamilit.
Ngjarja është shënuar rreth orës 17.30 të së dielës, në lokalin në pronësi të shtetases A.S.
Artur Murataj është burri i kushërirës së pronares së lokalit ku punonte.
Me të mësuar për sherrin e motrës me burrin e kushërirës, në lokal kanë mbërritur vëllezërit e saj. përkatësisht Valter Lala 27-vjeç dhe Elton Lala 41-vjeç, të cilët kanë filluar menjëherë ta godasin me grushte e sende ta forta Muratajn në pjesë të ndryshme të trupit.
Menjëherë pas dhunës së ushtruar, dy vëllezërit janë larguar nga vendngjarja, ndërsa janë shpallur në kërkim nga Policia e Shtetit, të akuzuar për veprën penale “Plagosje e lehtë me dashje në bashkëpunim”.
Sipas bluzave të bardha të Sarandës 42-vjeçari Murataj ishte i goditur në kokë, veshë e fytyrë dhe për rrjedhojë është shtruar në Spital.
