Prokuroria dhe Policia e Shkodrës kanë nisur hetimet pas zhdukjes së shefit të antidrogës për Ulqinin dhe Tivarin, Rudolf Dofi Elezoviç në kufirin midis Shqipërisë dhe Malit të Zi.
Autoritetet e drejtësisë në Malin e Zi kanë sjellë në Shkodër dokumentacionin dhe kërkesën për nisjen e hetimeve, për gjetjen e Rudolf Dofi Elezoviç.
Deri më tani nuk dihen shkaqet e humbjes së 54 vjeçarit ndërsa pala malazeze ka nisur kërkimet në lumin Buna në kufi me Shqipërinë. Po ashtu kërkime pritet që të bëhen edhe në pjesën shqiptare.
Mister mbetet fati i 54-vjeçarit ndërkohë që nuk ka asnjë dëshmi lidhur me lëvizjet apo momentet e fundit të Elezoviç përveç dëshmisë së familjarëve të cilët kanë treguar bisedën e fundit me të. Sipas familjarëve biseda e fundit është:“Po shkoj deri në Shkodër se kam një punë. Nuk vonohem se kur të vij do i bie shkurt”, është shprehur shefi i antidrogës për Ulqinin duke nënkuptuar se do të kthehej përmes kufirit ujor të Shqipërisë me Malin e Zi në lumin Buna në zonën mes Pentarit dhe Reçit.
Edhe nga sinjali i celularit, gjurma e fundit e 54-vjeçarit rezulton pikërisht në këtë zonë të kufirit ujor dhe prej aty nuk dihet asgjë më shumë rreth lëvizjeve të 54-vjeçarit.
Elezoviç shërbeu si shef i policisë së Ulqinit për gati gjashtë vjet, deri në vitin 2014, kur u zëvendësua nga Sead Djozoviç. Ai bashkëpunonte dhe me Policinë Shqiptare për të goditur trafikun e drogës në të dyja anët e kufirit.
54-vjeçari është zhdukur në 27 maj të këtij viti dhe që prej asaj dite nuk dihet asgjë për të./Opinion.al
