Këshilli i Lartë i Prokurorisë është mbledhur ditën e sotme në seancë plenare online, ku Komisioni i Posaçëm për vlerësimin e kandidatëve për Prokurorinë e Posaçme Kundër Korrupsionit dhe Krimit të Organizuar, ka prezantuar raportin/relacionin e vlerësimit për secilin prej kandidatëve në garë.
Kështu, janë emëruar 3 anëtarë të rinj të Strukturës së Posaçme Antikorrupsion, duke çuar në 12 numrin total të prokurorëve. Ata janë Sotir Kllapi, Dritan Prenci dhe Vladimir Mara.
Më i vlerësuari me pikë ishte Sotir Kllapi me 174 pikë. Në vend të dytë është Dritan Prençi me 171 pikë, ndjekur nga Vladimir Mara me 168 pikë.
Aktualisht, kjo strukturë është në pritje të 3 anëtarëve të rinj për të qenë e plotësuar me 15 anëtarë. Ende në garë janë Manjola Jajana, Anton Martini dhe Elisabeta Imeraj.
Po kështu sot u miratua projektvendimi “Për miratimin e listës me renditjen e kandidatëve për prokurorë në Prokurorinë e Posaçme dhe emërimin e tyre në detyrë”.
