Edhe pse Këshilli Kombëtar i PD-së i thirrur online nga Gazment Bardhi vendosi me 245 vota pro anulimin e zgjedhjeve për kreun e ri të Partisë Demokratike, grupi i Bashës ka njoftuar se procesi do të zhvillohet.
E teksa sot do të mbahet ky proces zgjedhor deputetja e Partisë Demokratike, Flutra Açka ka reaguar përmes një postimi të bërë në rrjete sociale.
Açka shkruan se sot nuk votohet për emrin, por për procesin pa kthim të demokratizimit të PD-së.
Sipas saj sot do të votohet për ndarjen përfundimtare nga tranzicioni dhe politika pseudoeuropiane.
“Qiejt e pastër politikë në demokraci, nuk ndodhin prej natyre si çdoherë pas stuhisë. Për qartësinë e tyre duhet të lesh shenjën tënde: të vizatosh blu mbi blu.
Dhe demokratët sot kanë shenjën e tyre. Sot nuk votohet emri, por procesi pa kthim i demokratizimit të Partisë Demokratike, votohet ndarja përfundimtare nga tranzicioni dhe politika pseudoeuropiane.
Është një betejë e vështirë, shumë e vështirë, por jo e pamundur”, shkruan Açka.
25 mijë anëtarë të PD-së janë thirrur që të votojnë për kryetarin e kësaj force politike. Demokratët do t’i drejtohen qendrave të votimit, sipas degëve të PD-së- duke nisur nga ora 8:00 deri në 19:00.
Ashtu siç është bërë e ditur këto kohë, në këtë proces garojnë dy kandidatë, ish-kryedemokrati Lulzim Basha dhe Gjergj Hani, ish-i përndjekur politik./Opinion.al
