Pavarësisht se prej muajsh opozita është shprehur se nuk do të marrë pjesë në zgjedhjet e 30 qershorit, PD dhe LSI kanë depozituar këtë të shtunë pranë KQZ emrat e anëtarëve për 90 komisionet zonale të administrimit zgjedhor.
Sekretari për Çështjet Zgjedhore Ivi Kaso u paraqit në KQZ bashkë me përfaqësuesin e LSI-së, për të dorëzuar listën me emrat e komisionerëve.
Dy partitë më të mëdha opozitare, të cilat kanë vendosur të mos marrin pjesë në zgjedhjet lokale, caktuan anëtarët e tyre në komisione për të monitoruar shkeljet ligjore, që sipas tyre, bëhen nga Partia Socialiste.
Ndërkohë, Komisioni Qendror shqyrtoi listat për kandidatët e këshillit bashkiak të disa partive, të cilat janë kthyer për rishqyrtim pasi kishin mungesë të dokumentacionit të listës shumë emërore në disa qarqe të vendit.
