UEFA zyrtarizoi këtë të enjte kandidatët për zgjedhjet që do të mbajë më 5 Prill më Lisbonë ku do të mbahet kongresi i 47-të i këtij organizmi. Tek ata të cilët garojnë për një vend në Komitetin Ekzekutiv është edhe kreu i Federatës Shqiptare të Futbollit, Armand Duka.
Ai kërkon mandatin e dytë në këtë post pas fitores ne kongresin e shkurtit të 2019-ës. Në garë janë 13 kandidatë për 9 vende. Kohëzgjatja e detyrës do të jetë deri në 2027.
Kjo pozitë është edhe një zë më shumë për futbollin shqiptar në UEFA. Ndërkohë për postin e presidentit të organizmit të futbollit Europian garon vetëm kreu aktual Aleksander Çeferin. Ai është në detyrë prej vitit 2016, duke pasuar Mishel Platininë në këtë pozicion.
