Në Shtetet e Bashkuara të Amerikës ka nisur votimi për zgjedhjen e presidentit të ri të Amerikës.
Ndërkohë një reagim ka ardhur edhe nga kandidatët Kamala Harris dhe Donald Trump.
Përmes postimeve në rrjetet sociale, ata u bëjnë thirrje amerikanëve të ushtrojnë të drejtën e tyre duke votuar.
Harris, në një postim ku shfaqet me Tim Watz, shkruan: “Trokitni në dyer. Thirrni votuesit. Kontaktoni miqtë dhe familjen. Së bashku, ne do të shkruajmë kapitullin tjetër të historisë më të madhe të treguar ndonjëherë.”
Ndërsa Trump shkruan: “Tani është zyrtarisht DITA E ZGJEDHJEVE! Kjo do të jetë dita më e rëndësishme në historinë amerikane. Entuziazmi i votuesve është i madh sepse njerëzit duan ta bëjnë Amerikën sërish të madhe. Kjo do të thotë se radhët do të jenë të gjata! Kam nevojë që ju të jepni votën tuaj, pavarësisht sesa duhet të prisni. QËNDRONI NË RADHË!
Demokratët Radikalë Komunistë duan që ju të mblidhni gjërat dhe të shkoni në shtëpi. Së bashku, ne do të kemi një fitore të jashtëzakonshme dhe do ta bëjmë AMERIKËN SËRISH TË MADHE!”
