FIFA do të ketë një president të ri prej ditës së premte. Kongresi i jashtëzakonshëm do të zgjedhe kreun e ri të Federatës Botërore të Futbollit në seancën që do të mbahet në Zyrih.
Në garë janë 5 kandidatë mes tyre edhe sekretari i përgjithshëm i UEFA-s, Gianni Infantino, i cili shikohet si favorit. Ky kongres u kërkua që të shtyhej nga Ali Bin Al-Hussein, pasi pretendonte se është pak transparent, por pretendimi i tij u hodh poshtë nga Gjykata e Arbitrazhit Sportiv.
Pritet që të votohet edhe për ndryshimin e rregullores që parashikon kufizimin e mandateve të presidentit të FIFA në 3 me nga 4 vite secili. Komiteti Ekzekutiv do të zëvendësohet nga një këshilli me 36 anëtarë të zgjedhur nga federatat pjesë e FIFA-s. Për të ndryshuar këto pika duhen ¾ e votave. Në këtë kongres është ftuar edhe Kosova në statusin e vëzhguesit.
Pas skandaleve të shumta që sollën edhe largimin e Sepp Blatter nga posti vitin e kaluar, pritet më shumë transparencë./Tv Klan
