Në një konferencë për shtyp, Presidenti ukrainas Volodymyr Zelenskiy iu kundërpërgjigj Presidentit amerikan Donald Trump për deklaratën se Ukraina ishte përgjegjëse për agresionin në shkallë të plotë të Rusisë.
Sipas tij, Presidenti amerikan gjendet në një flluskë dezinformimi rus. Duke folur përpara bisedimeve me të dërguarin e Trump në Ukrainë, Keith Kellog, Zelenskiy tha se do të dëshironte që ekipi i Trump të kishte “më shumë të vërteta” për Ukrainën.
“Unë do të doja që ekipi i Trump të kishte më shumë të vërteta. Ata po e lënë Putinin të dalë nga izolimi dhe mendoj se Putini dhe rusët janë vërtet të lumtur sepse janë përfshirë në diskutime, dhe pati sinjale”.
Ai u shpreh gjithashtu se nëse dikush do të donte ta zëvendësonte si president kjo gjë nuk do të ndodhë tani.
“Nëse dikush dëshiron të më zëvendësojë tani, do të thosha se nuk do të ndodhë tani. Ne e kemi parë këtë dezinformim, e kuptojmë që vjen nga Rusia dhe kemi prova që këto po diskutohen mes Amerikës dhe Rusisë”.
Zelenskiy tha se SHBA i kishte dhënë Ukrainës 67 miliardë Dollarë armë dhe 31.5 miliardë Dollarë mbështetje buxhetore dhe se kërkesat amerikane për 500 miliardë Dollarë minerale nuk janë serioze dhe se ai nuk mund ta shesë vendin e tij.
Sipas tij nga vlerësimet paraprake, kostoja e luftës në Ukrainë deri tani është 320 miliardë Dollarë.
Ndryshimi i politikës amerikane e vë atë në kundërshtim me aleatët në Bashkimin Evropian.
Franca në një reagim ka deklaruar se nuk e kuptonte logjikën e komenteve të Trump se Ukraina ishte fajtore për nisjen e agresionit rus.
Klan News
