Televizioni gjerman ZDF ka pasqyruar protestën e djeshme të opozitës shqiptare, duke thënë se zemërimi i qytetarëve po rritet dhe pjesëmarrja ishte masive. Sipas gazetares gjermane që ka përgatitur kronikën, “skandali i fundit tregon se anëtarët e qeverisë kanë blerë vota për të manipuluar zgjedhjet. Demonstruesit kërkojnë largimin e qeverisë”.
Ajo ka intervistuar Kryetarin e Partisë Demokratike Lulzim Basha si edhe një qytetare, Zylyha Bitri e cila thotë se i ka të dy djemtë e papunë dhe të ardhurat nuk i mjaftojnë për të jetuar. “Gjatë viteve të fundit janë rritur taksat, çmimi i naftës është dyfishuar, çmimi i dritave është rritur”, ka thënë Zyliha Bitri, pronare e një kafeneje .
Ndërkohë, Lulzim Basha ka përsëritur akuzat ndaj qeverisë. “Kryeministri Rama kontrollon qeverinë, parlamentin, drejtësinë dhe median. Është një autokrat i korruptuar. Nën sundimin e tij, Shqipëria është kthyer në eksportuesin më të madh të drogës”, ka thënë ai.
Në kronikën e ZDF-së thuhet se kryeministri nuk tregon mirëkuptim për protestën, duke u shprehur se mandati nuk është llogari, teksa përmendet edhe përplasja mes protestuesve dhe policisë./Opinion.al
