TIRANE- Kjo është pasaporta e Domart Konjarit, 43 – vjeçari që u lirua një ditë më parë nga Gjykata e Apelit për Krimet e Rënda.
Me këtë dokument ai tentoi të kalonte kufirin me datën 5 nëntor të vitit 2016.
Kjo është faqja e parë, me foton e saktë të Konjarit, por me emrin Arben Lazri, i datëlindjes 26.12.1976.
Pasaporta ishte lëshuar me datë 30 tetor 2015, 5 ditë para se Konjari të tentonte largimin drejt Greqisë nga Kapshtica.
Ajo është e rregullt dhe falsifikimin Konjari rezulton ta ketë bërë në njësinë Numër 10, ku ka marrë çertifikatë me emrin e Arben Lazrit dhe me foton e tij.
Hetimet zbuluan se në këtë ngjarje ishin përfshirë një punonjëse e gjendjes civile dhe inspektori i policisë së zonës. Të dy u proceduan penalisht.
Pas marrjes së shenjave të gishtave, policia zbuloi se ai ishte në kërkim ndërkombëtar, pasi rezultonte i dënuar me 10 vjet burg në Francë, për trafik droge.
Megjithatë ai u la i lirë të hënën, edhe pse pas një letër porosie të mbërritur nga Franca, Prokuroria për Krimet e Rënda e kishte vënë nën hetim Konjarin për trafik të lëndëve narkotike.
Avokati i tij thotë se Konjari u lirua për shkak se prokuroria kishte shkelur afatet e hetimit.
43 – vjeçari Konjari në vitin 2006 u arrestua për vrasjen e Fatjon Naxhakut, tek Shkolla e Kuqe. Por u lirua pas pak kohe, për shkak se hetimet provuan se ai e kishte kryer krimin për vetëmbrojtje. /Tv Klan
