Policia e Fierit ka zbuluar një rrjet kultivimi kanabisi dhe ka sekusetruar një laborator për prodhimin e tij.
Katër persona në bashkëpunim me njëri- tjetrin, kishin përshtatur ambientin e një banese me aparatura që shërbejnë për kultivimin dhe prodhimin e kanabisit.
Gjatë kontrollit të banesës, u gjetën dhe u sekuestruan 312 fidanë kanabis, të kultivuara, pajisjet të cilat kanë shërbyer për kultivimin e tyre si dhe një pajisje presimi, gërshërë etj.
U arrestuan në flagrancë A.K., 22 vjeç dhe Q.K., 48 vjeçe, banues në Mbrostar, Fier dhe u shpallën në kërkim dy bashkëpunëtorë të tjerë, konkretisht shtetasit A.K., banues në Mbrostar, Fier dhe F.B., 33 vjeç, banues në Kosovë.
Nga këqyrja në ambientet e jashtme të rrjetit elektrik, është konstatuar një lidhje e paligjshme e energjisë elektrike, e cila shërbente për furnizimin e paisjeve, që ndihmonin në kultivimin dhe rritjen e bimëve narkotike. Në këtë kuadër u proceduan penalisht tre elektricistë, G.M., E.M. dhe B.Q., banues në Fier. Këta shtetas duke shpërdoruar detyrën kanë lejuar lidhjen e paligjshme të energjisë elektrike në banesën e shtetasit A.K.
Materialet për veprime të mëtejshme do t’i kalojnë Prokurorisë pranë Gjykatës së Shkallës së parë Fier, për veprat penale “Prodhimi dhe shitja e narkotikëve”, “Kultivimi i bimëve narkotike”, “Vjedhja e energjisë elektrike” dhe “Shpërdorimi i detyrës”. /Opinion.al
