Bandat kriminale po përdorin shërbimin delivery të ushqimit për të shpërndarë substanca narkotike, tha Organizata Ndërkombëtare e Policisë (INTERPOL).
Nëpërmjet një njoftimi agjencia paralajmëroi 194 agjencitë e saj anëtare për “këtë formë të re të kriminalitetit”.
Tashmë substanca si kokaina, marihuana, ketamina dhe ekstazia vendosen në kuti picash ose në mbështjellës tjerë të ushqimit. Këto raste janë identifikuar më së shumti në vende si Malajzia, Spanja dhe Britania e Madhe.
Dërgesat nga postierë të ushqimit bëhen përmes biçikletave, motoçikletave ose makinave.
“Në një rast në Malajzi, një postier për shpërndarjen e ushqimit e kontaktoi policinë dhe kërkoi që paketa e tij e ushqimit të inspektohej pasi ishte e dyshimtë”, tha Interpol.
Në Spanjë, shtatë persona janë arrestuar pasi u paraqitën si postierë të dërgesave të ushqimit por atyre iu gjet drogë në çanta. Në Irlandë, policia gjeti tetë kilogramë kokainë dhe dy pistoleta të fshehura në kuti picash.
“Ndërsa kriminelët vazhdojnë t’i përshtatin aktivitetet e tyre në botën me COVID-19, paralajmërimet e Interpolit janë mjete që u mundësojnë organeve policore në të gjithë botën të mësojë nga sukseset e njëri-tjetrit dhe të adresojë ndryshimin e modeleve të krimit”, tha Stephen Kavanagh, drejtori ekzekutiv i Interpolit.
Shumë vende në botë kanë ndërmarrë masa të izolimit për të parandaluar përhapjen e koronavirusit të ri. Mirëpo, në shumicën e këtyre vendeve, lejohen blerjet online dhe dërgesat e ushqimeve në shtëpitë e banorëve. /Opinion.al
