Agjencitë perëndimore të inteligjencës kanë zbuluar komplote ruse për të kryer vrasje, zjarrvënie dhe sabotime të tjera në Evropë kundër kompanive dhe njerëzve të cilët e mbështesin ushtrinë e Ukrainës, tha një zyrtar qeveritar perëndimor.
Rusia nganjëherë ka rekrutuar kriminelë të zakonshëm në vendet e huaja për t’i kryerë sulmet, tha zyrtari, i cili foli në kushte anonime, raporton Associated Press.
Një komplot i madh, që u zbulua së voni, e kishte në shënjestër Armin Pappergerin, shefin ekzekutiv të kompanisë së mbrojtjes në Gjermani, Rheinmetall, tha zyrtari.
Ai nuk dha hollësi për komplotet e tjera, për të cilat për herë të parë raportoi CNN.
CNN raportoi se Shtetet e Bashkuara e kishin njoftuar Gjermaninë për komplotin dhe kjo ua kishte mundësuar agjencive të sigurisë ta mbronin Pappergerin dhe kështu të dështonte komploti kundër tij.
Rheinmetall është furnizues i madh i teknologjisë ushtarake dhe i predhave të artilerisë në Ukrainë, e cila është duke luftuar për t’i zmbrapsur forcat ruse. Kjo kompani e hapi muajin e kaluar një objekt për mirëmbajtjen dhe autoblindave dhe riparimin e tyre në perëndim të Ukrainës dhe synon të fillojë prodhimin brenda Ukrainës.
Zëdhënësja e Këshillit amerikan të Sigurisë Kombëtare, Adrienne Watson, nuk deshi të komentojë për komplotin e dyshuar për ta vrarë Pappergerin, por tha se veprimet e Rusisë nuk mund të ndikojnë në mbështetjen e aleatëve për Ukrainën.
“Ne kemi qenë të qartë se veprimet e Rusisë nuk do t’i frenojnë aleatët për vazhdimin e mbështetjes për Ukrainën”, tha ajo.
Ministria e Brendshme e Gjermanisë nuk mund të komentojë “në rastet e kërcënimeve individuale”, tha zëdhënësi i kësaj ministrie, Maximilian Kall, por shtoi se “ne e marrim shumë seriozisht kërcënimin e rritur dukshëm të agresionit rus”.
“Ne e dimë se regjimi i [presidentit rus Vladimir] Putin dëshiron, mbi të gjitha, ta minojë mbështetjen tonë për Ukrainën, e cila po mbrohet kundër luftës agresore ruse, por Qeveria gjermane nuk do të frikësohet”, tha ai.
Zyrtarët evropianë të mbledhur në samitin e NATO-s në Uashington këtë javë, folën për ballafaqimin me përshkallëzimin e sulmeve “hibride”, për të cilat ata e fajësojnë Rusinë dhe aleatët e saj.
Në prill, hetuesit gjermanë i arrestuan dy burra ruso-gjermanë nën dyshimin për spiunazh, njëri prej të cilëve akuzohet se u pajtua të kryente sulme ndaj shënjestrave të mundshme, përfshirë ndaj objekteve ushtarake amerikane, me shpresën e sabotimit të ndihmës për Ukrainën.
Gjermani është bërë furnizimi i dytë më i madh i armëve në Ukrainë, pas Shteteve të Bashkuara, prej se Rusia e nisi pushtimin e Ukrainës në shkurt 2022.
Zëdhënësi i Kremlinit, Dmitry Peskov, i hodhi poshtë raportimet për komplotin për ta vrarë Rappergerin./REL
