Mediat turke kanë publikuar foto të dy personave që kanë shoqëruar shtetasin turk Faruk Fatih Ozer në Tiranë dhe e kanë ndihmuar të arratiset.
Ata janë fiksuar nga kamerat e sigurisë se hotelit, ku turku po qëndronte. Media turke “Hurriyet” shkruan se personi me xhup me ngjyrë të kuqe dhe të bardhë, është identifikuar nga policia si Altjan Canaj. Ky i fundit pasi u shoqërua nga policia e shtetit është marrë në pyetje.
Televizioni TRT-së arriti të zbardhë dëshminë e parë të Altjan Canaj. Në dëshminë e dhënë Canaj pranoi se me shtetasin Edevaldo Haxhiu ndihmuan Faruk Fatih Özer, për të cilin ai tha se ishte personi kryesor që e ndihmoi në arratisje.
Kanë qenë këta persona që e kishin pritur 27-vjeçarin turk në aeroportin e Rinasit dhe më pas e kishin çuar në hotel.
Canaj ka treguar se më pas është njohur me lajmet në media se Faruk Fatih Ozer akuzohet për mashtrim. Kur mësoi këtë fakt, ai tha se u takua përsëri me Edevaldo Haxhiun. Po ashtu ai deklaroi se kishte ikur nga policia për 15 ditë dhe ishte fshehur për shkak se kishte frikë.
27-vjeçari turk sipas mediave ka qëndruar te një shtëpi tek zona e Pazarit të Ri por në momentin që policia shkoi për ta arrestuar, ai nuk u gjet aty.
Shtypi turk shkruan se bosi i kriptomonedhave vijon të jetë i strehuar në Shqipëri. Ai kërkohet që prej 21 Prillit nga autoritetet turke për mashtrim me 2 miliardë dollarë në bursën e kriptomonedhave THODEX, ku kishin investuar rreth 400 mijë persona./Opinion.al
