Më shumë se 300 kampione indesh të marra nga të burgosurit e vrarë gjatë holokaustit në Berlin do të “varrosen” sot. Kampionet u gjenden në pronën e Hermann Stieve, ish-profesor anatomie në spitalin universitar Charité i cili ka ndërruar jetë në vitin 1952.
Studiuesit thonë se Stieve kishte një bashkëpunim të ngushtë me nazistët duke marrë nga ata trupat e 184 personave, shumica gra, të ekzekutuar për arsye politike.
Copat e lëkurës, shumica më të vogla se një milimetër, ruheshin në kuti të vogla të zeza me etiketa ku ishin dokumentuar emrat.
Menjëherë pas gjetjes së tyre ato u transportuan në universitetin ku kishte punuar profesori gjerman. Administratorët caktuan Qendrën e Memorialit të Rezistencës Gjermane për të bërë kërkimet e duhura në identifikimin e personave të vrarë.
Hulumtimi tregoi se trupat ishin transportuar nga një shofer pak kohë pas ekzekutimit në burgun Plötzensee të Berlinit. Ndërkohë që Hitleri ishte në pushtet, në këtë burg janë ekzekutuar rreth 3000 njerëz me varje ose prerje koke.
Meqenëse Stieve nuk ishte anëtar i Partisë Naziste ai nuk u hetua pas luftës dhe mbajti postin e shefit të katedrës së anatomisë në universitetin ku punonte deri më 1952.
Dr Karl Max Einhäupl, administratori i përgjithshëm i universitetit Charité tha: Shpresojmë që duke i varrosur këto kampione indesh t’i rikthejmë sado pak dinjitetin viktimave. /Burimi: BBC
