Që prej ditës së djeshme, 1 qershor, ka nisur zbatimi i marrëveshjes në praktikë për pensionet me Italinë.
Lajmin e ndau në rrjetet sociale më herët, vetë kryeministri Edi Rama, duke informuar se homologia e tij italiane Giorgia Meloni, i solli dokumentin final të procesit ligjor mbi zbatimin e marrëveshjes së pensioneve me Italinë gjatë vizitës në Tiranë ku mori pjesë në samitin e Komunitetit Politik Europian.
Marrëveshja me Italinë, e cila hyri në fuqi në muajin Mars, garanton të drejtat për pensionet e rreth gjysmë milioni shqiptarë dhe 4 mijë italianëve.
Sipas dokumentit gati 20% e personave 67 vjeç, të cilët nuk janë trajtuar deri më tani me pension do të mund të përfitojnë të ardhura deri në 400 Euro në muaj.
Një qytetar shqiptarë që ka në total 27 vite pune, nga të cilat 14 vite në Itali dhe 13 në Shqipëri do të marrë pension në Itali për 14 vite dhe në Shqipëri për 13 vite.
Buxheti i dedikuar nis me 7.6 milionë euro për vitin e parë të aplikimit dhe mbyllet me 20.3 milionë në fund të këtij planifikimi buxhetor.
Marrëveshja ju jep mundësi emigrantëve që të përfitojnë edhe nga skema të tjera siç janë: pensionet e invaliditetit; pensionet familjare; pagesa e papunësisë; nga sëmundjet si edhe nga barrëlindja.
Kategoritë që përfitojnë
Nga kjo marrëveshje do të përfitojnë edhe ata qytetarë që e kanë mbushur moshën e daljes në pension përpara disa vitesh, por janë përjashtuar nga marrja e pensionit për shkak të mosplotësimit të viteve të kontributeve, atij minimal prej 15 vitesh në vendin tonë dhe 20 vitesh në Itali.
Marrëveshjet e mëparshme
Nga viti 2005 e deri më sot Shqipëria ka nënshkruar një sërë marrëveshjes në fushën e sigurimeve shoqërore mes të cilave; me Turqinë, Belgjikën, Hungarinë, Luksemburgun, Çekinë, Maqedoninë e Veriut, Gjermaninë, Austrinë, Bullgarinë, Kanadanë, Rumaninë, Kosovën, me Konfederatën e Zvicrës dhe me Kroacinë. Sakaq në fuqi pritet të hyjnë edhe marrëveshjet me Malin e Zi e Bullgarinë.
Në proces ende janë marrëveshjet me Poloninë e Serbinë, ndërsa me Francën procesi është drejt arritjes së një dakordësie për fillimin e negociatave.
Vende si Sllovenia, Spanja, Danimarka, Moldavia dhe Emiratet e Bashkuara Arabe, kanë dhënë dakordësinë për fillimin e negociatave.
Procesi më i gjatë dhe më i vështirë për palën shqiptare është ai me Greqinë./tvklan
