Gjykata ka vendosur masën e sigurimit “arrest në burg” për shtetasin Taulant Nençaj, i dyshuar për “Shtrëngimi me anë të kanosjes ose dhunës për dhënien e pasurisë”, “Kundërshtimit të punonjesit të policisë së rendit publik” dhe “Shkatërrimit të pronës”.
Ky person është i dyshuar se ka shtrënguar një shtetase nga Shkodra për t’i dhënë 10 mijë euro. Ngjarja ka ndodhur 3 ditë më parë. I dyshuari për “gjobvënie” qarkullonte me automjet “Tuareg” në zonën e “Don Boskos”, në drejtim të rreth-rrotullimit të “Zogut të Zi”, në Tiranë. Patrullat e përgjithshme të policisë e kanë parë dhe i kanë bërë shenjë të ndalojë. Drejtuesi i jep gaz dhe lëviz në trotuar, me pas në rrugë, në krah të kundërt të rrethrrotullimit të Zogut të Zi , lëvizje në sens të kundërt, duke goditur disa mjete , duke kundërshtuar , punonjës policie të patrullës së përgjithshme dhe Qarkullimit Rrugor.
Menjëherë në ndjekje janë vënë forcat e Shërbimit të Forcës së Posaçme dhe Operacionale të cilat kanë bërë të mundur pas ndalimit të automjetit Tuareg, ndjekjes me këmbë kapjen dhe arrestimin në Rrugën Pandi Dardha në Laprakë, në marketin e tij.
Ky person më 19 Maj 2017 ka tentuar të komunikojë në rrjete sociale me një shtetase nga Shkodra. Në mesazhet në rrjete sociale, rezulton se i dyshuari fillimisht i ka shkruar të dëmtuarës për njohje dhe më tej, e ka kërcënuar se, nëse nuk do t’i japë 10 mijë euro, ai do të publikojë disa foto intime të të dëmtuarës.
Vajza është paraqitur në Policinë e Shkodrës, e cila referoi rastin në Prokurorinë për Krime të Rënda.
Rezultoi se personi që bënte kërcënimin ishte në Tiranë. Duke ndjekur rastin në dinamikë, nga ana e Prokurorisë u përcaktua vendi se ku lëvizte i dyshuari dhe u njoftua Policia për të kryer veprimet në terren, me qëllim identifikimin dhe shoqërimin e këtij personi për të sqaruar situatën.
Pas arrestimit të tij në flagrancë, nga ana e Prokurorisë për Krime të Rënda u krijuan dyshime të arsyeshme, në bazë të provave, që shtetasi Taulant Neçaj është personi që ka shtrënguar kallëzuesen nga Shkodra për t’i dhënë 10 mijë euro.
