KORÇË- Policia ka zbardhur ngjarjen e Korçës ku një 25 vjeçar u qëllua dje në mesditë në mes të qytetit me pistoletë.
Ngjarja ndodhi në lagjen nr. 7, në rrugën “Gjon Buzuku”, rreth orës
15:20, përballë njërës prej shkollave të qytetit ku të rinjtë, Aleksandër
Beshiri, 25 vjeç dhe Kristo Horanlli, 30 vjeç, kanë nisur të grinden për shkak të një femre.
Aleksandër Beshiri i ka kërkuar autorit Kristo Horanlli të mos ngacmonte më vajzën me të cilën ai ishte i lidhur. Grindja ka degraduar deri në përdorimin e armës së zjarrit. Për pasojë, është plagosur Aleksandër Beshiri, i cili ka marrë një plagë
në këmbë dhe është dërguar menjëherë në spitalin rajonal të Korçës,
ku, sipas të dhëna, ndodhet jashtë rrezikut për jetën.
Ndërkaq, policia pas mbërritjes së menjëhershme në vendngjarje ka
identifikuar si autor Kristo Horanllin, rreth 30 vjeç, duke mundësuar
dhe arrestimin e tij brenda pak minutash. Burimet e policisë bënë me
dije se nga deklarimet e para dyshohet që konflikti mes autorit dhe të
plagosurit ka nisur, pasi 30 vjeçari Horanlli ngacmonte vajzën me të
cilën ishte lidhur i plagosuri.
Beshiri ka kërkuar ta sqarojë autorin në mënyrë që ai ta linte të qetë
vajzën me të cilën kishte lidhje, por autori, person me precedentë
penalë, nuk i ka kursyer plumbat dhe e ka plagosur 25vjeçarin.
Sipas bluve të qytetit juglindor, Kristo Horanlli rezulton një person i
skeduar, pasi është dënuar më parë për veprën penale “vrasje me
dashje mbetur në tentativë” dhe “prodhim dhe mbajtje e armëve pa
leje”.
