Janë zbardhur dëshmitë e dhëna para hetuesve të efektivëve të policisë që shoqëruan 32-vjeçarin Lear Kurti në Komisariatin nr.3 në Tiranë mbrëmjen e 19 tetorit.
Sipas dëshmive të siguruara nga “News 24”, njëri prej efektivëve mësohet të ketë thënë se e ndoqi të riun për rreth 2 minuta. Pasi e ndaluan, polici dhe 32-vjeçari janë rrëzuar në trotuar dhe aty i riu ka filluar të shfaqë probleme me frymëmarrjen.
Ndërkohë, në dëshminë e efektivit tjetër thuhet se pasi mbërritën në komisariat, Lear Kurti filloi të bënte lëvizje të pakontrolluara dhe se është dërguar në Spitalin e Traumës me makinë policie pasi ambulanca po vonohej.
Ndërkohë, në deklaratat e tyre nuk vihet re të thuhet se 32-vjeçari gëlltiti lëndë narkotike ashtu siç u deklarua në fillim të ngjarjes. Po ashtu dëshmitë e efektivëve të policisë bien në kontraditë me deklaratën e AMP, e cila thotë se Lear Kurti u ndje keq në komisariat, ndërkohë që efektivët kanë dëshmuar që ai u ndje keq në vendin ku u ndalua.
Dëshmitë
“Rreth orës 23:07 bashkë me dy kolegët ishim në patrullim me makinë në rrugën “Riza Çuka” dhe në një moment konstatuam një të ri, i cili po ecte dhe kreu disa veprime të dyshimta. Në bazë të kësaj i kërkova verifikim. I kërkova mjet identifikimi, por ai nuk kishte. Më pas e pyeta nëse kishte sende të kundërligjshme me vete dhe më pas sa dola nga automjeti, i riu u largua me vrap. Pasi e ndoqa pas 2 minutash arrita ta ndaloj përballë një marketi. Pasi e ndalova, si unë ashtu edhe i riu u rrëzuam përtokë dhe në këtë moment u afruan edhe dy kolegët e mi. E ngritëm në këmbë të riun dhe kërkuam ndihmën e patrullave. E ulëm në trotuar dhe pamë që i riu kishte vështirësi në frymëmarrje. Menjëherë kontaktova me drejtorinë vendore dhe kërkova një autoambulancë dhe që i riu të ndjehej më mirë e futëm në makinë, jo në makinën që kisha në shërbim, por në makinën tjetër. Filloi të ndihej më mirë dhe i thamë të qetësohej, ndërkohë që aty erdhën patrullat me kod 20 dhe 22. Në këtë moment kolegu tjetër i vendosi prangat dhe më pas u kthyem për të kontrolluar rrugën nëse kishte hedhur apo jo sende të kundraligjshme por nuk gjetëm, kurse patrulla tjetër e dërgoi të riun në komisariat.”
Më pas vijon dëshmia e efektivit tjetër që thotë: “I riu fërkonte gjoksin dhe ulte kokën poshtë. Kur arritëm në komisariat i riu u kap te sedilja e makinës dhe nuk donte që të dilte, më pas e nxorëm nga makina me vështirësi dhe sapo doli prej aty filloi të dridhej, të shtrëngonte dhëmbët dhe bënte lëvizje të pakontrolluara. Menjëherë tentuam t’i jepnim ndihmë duke u munduar t’i hapnim gojën dhe i mbajtëm kokën mbrapa që të mos godiste pllakat, pasi po bënte lëvizje të pakontrolluara, i vendosëm një shkop hekuri në dorë pasi menduam për shenja epilepsie. Kolegët e mi njoftuan autoambulancën dhe duke parë gjendjen e tij, e futëm në automjet policie dhe e dërguam në spitalin e traumës pasi ambulanca po vonohej”.
Nga dëshmia e efektivëve disa momente kyçe:
-Efektivi deklaron se kur e ndaloi te riun u rrëzuan në tokë të dy. Filloi të ndjehej keq dhe qe ta ndihmonin e futen makinë për të qëndruar ulur. Deklaratë kontradiktore me AMP që tha se i riu u ndje keq në komisariat.
-Në komisariat u dërgua nga patrulla tjetër dhe jo nga patrulla që e ndaloi.
-I riu është mbajtur me forcë te sedilja e makinës dhe nuk donte të dilte dhe ta fusnin në komisariat.
-Në dëshmi efektivët thonë që ambulanca u vonua dhe prandaj e dërguan vetë në spital, ndërsa burime për Neës24 thonë që ambulanca shkoi në komisariatin nr.3
-Në deklaratë AMP thotë u ndje keq në komisariat, ndërsa efektivë kanë dëshmuar që, që në vendin që u ndalua u ndje keq dhe i merrej fryma.
