Të tjera detaje janë mësuar rreth ngjarjes tragjike të së dielës, ku 23 vjecari Aldison Belulaj vrau me pistoletë studenten e Drejtësisë Ariela Murati. Të dy të rinjtë ishin nga Zharrëza e Patosit dhe kishin kryer shkollën e mesme në të njëjtin gjimnaz. Siç kanë deklaruar në polici njerëzit e Aldisonit i cili po lufton për jetën në Spitalin e Traumës, të dy të rinjtë kanë patur një lidhje dashurie që ka nisur 4 vite më parë në bankat e shkollës. Por muajt e fundit, Ariela kishte vendosur të ndahej dhe në Nëntor 2017 gjithçka kishte marrë fund për të, por jo për djalin që e përndiqte këmba këmbës. Mësohet se gjithashtu ai i kishte dërguar familjarët në shtëpinë e Arieles për ti kërkuar dorën, por nuk kishin kthyer pergjigje. Ariela ishte ankuar tek njerëzit e saj të afërm për shqetësimin që i krijonte Aldisoni, por ky i fundit sërish nuk ishte terhequr.
Sëfundmi, thonë njerëzit që i kanë njohur, Ariela kishte filluar të shoqërohej me një djalë tjetër, ç’ka ka çuar në tërbimin e Aldisonit që vazhdonte ta donte Arielën. 10 ditë më parë ajo kishte ndërruar numrin e telefonit dhe dilte gjithnjë e shoqëruar për të mos patur kontakte me ish-të dashurin. Por duket se 23 vjeçari kishte udhëtuar nga Fieri në Tiranë pikërisht për të kryer aktin ekstrem. Ai i ka ruajtur tre vajzat, Arielën, motrën e saj dhe vajzën e tezes teksa i drejtoheshin shtëpisë që kishin me qira pranë vendit ku ndodhi krimi, tek Fakulteti i Mjekësisë. Motra dhe kushërira kanë parë skenën e tmerrshme të vrasjes së Arielës vetëm pak minuta pasi ky i fundit i kishte dalë përpara duke i kërkuar të ktheheshin bashkë….
/Opinion.al
